| |
Volesse sente mo 'no bell'addoro,
l'addoro de la terra appena smossa,
quanno la zappa
la pigghia e la capoota sott'e 'ncoppa.
Volesse sente mo 'no bell'addoro,
l'addoro de lo ggrano spas'a lo sole,
mentre lo smove
vottenno lo rataviello la padrona.
Volesse sente mo 'no bell'addoro,
l'addoro de lo ffieno quanno chiove,
che te 'mboca
com'a lo fiato de 'na 'nnammorata.
Volesse sente mo 'no bell'addoro,
l'addoro de li sfuogghi de graodinio,
ca la matina
le smove la forcina e po' l'appara.
Volesse sente mo 'no bell'addoro,
l'addoro de 'na levena tagghiata,
quanno l'accetta
la spacca e po' la fa cadé pe' 'nterra.
Volesse sente mo 'no bell'addoro,
l'addoro de la reghena seccata,
o quann'a giugno
la vai a cogghie 'ncopp'a la montagna.
Volesse sente mo 'no bell'addoro,
l'addoro de jneste quann'è maggio,
ca te stordisce,
te fa sentì n'auciello assaocato.
Volesse sente mo 'no bell'addoro,
l'addoro de le mmela dint'a li cisti,
e sistemati
'ncopp'a li stipi e sott'a li lietti.
Volesse sente mo 'no bell'addoro,
l'addoro de 'na fico ancora cèreva,
quanno la cuogghi
e scenne da la ponta lo llatto fizzo.
Volesse sente mo 'no bell'addoro,
l'addoro de lo llatto appena munto,
dint'a lo sicchio
mentre che spriscia ancora da la menna.
Volesse sente mo 'no bell'addoro,
l'addoro de 'na pezza de caso frisco,
quanno la tagghi
e po', chiudenno l'uocchi, te la mangi.
Volesse sente mo 'no bell'addoro,
l'addoro dolce de 'na sopressata,
tosta e sudata
e rossa com'a 'na vocca pittata.
Volesse sente mo 'no bell'addoro,
l'addoro de lo vino quanno volle
dint'a lo tino
co li moschilli che ce vanno attuorno.
Volesse sente mo 'no bell'addoro,
l'addoro de lo ppane dint'a lo furno,
mentre lo ccaccia,
bell'accoppato e tunno, la fornara.
Volesse sente mo 'no bell'addoro,
ma dint'a 'sta città so' sulo fogne:
pe' l'aria sienti
sulo la puzza de li gabinetti.
|
Per ascoltare questo
canto
clicca qui
Per vedere e sentire gli odori
|
